ចាប់ពីខែកក្កដា និងខែកញ្ញា ឆ្នាំ២០២៣ មជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអង្គជំនុំជម្រះវិសាមញ្ញក្នុងតុលាការកម្ពុជា (ម.ត.ឯ.ច.) នៃទីស្ដីការគណៈរដ្ឋមន្ត្រី បានរៀបចំកម្មវិធីវាយតម្លៃពាក់កណ្ដាលគម្រោងផ្ដល់អាហារូបករណ៍សរសេរសារណាចំពោះនិស្សិតបរិញ្ញាបត្រឆ្នាំទី៤ ដែលទទួលបានអាហារូបករណ៍ពីមជ្ឈមណ្ឌលក្នុងឆ្នាំ២០២៣ នេះ។
កម្មវិធីវាយតម្លៃពាក់កណ្ដាលនេះ ធ្វើឡើងដើម្បីពិនិត្យមើលវឌ្ឍនភាពនៃការស្រាវជ្រាវរបស់និស្សិត ដើម្បីងាយស្រួលក្នុងការផ្ដល់មតិណែនាំ ក៏ដូចជាការតម្រង់ទិសឲ្យលទ្ធផលនៃការស្រាវជ្រាវមានភាពប្រសើរឡើង។
ការវាយតម្លៃពាក់កណ្ដាលគម្រោងផ្ដល់អាហារូបករណ៍សរសេរសារណា ចំពោះនិស្សិតបរិញ្ញាបត្រឆ្នាំទី៤ ដែលទទួលបានអាហារូបករណ៍ពីមជ្ឈមណ្ឌលនាពេលនេះមានការចូលរួមពីសំណាក់និស្សិតទាំង៧ក្រុម លោកគ្រូអ្នកគ្រូជាទីប្រឹក្សារបស់និស្សិត ក៏ដូចជាគ្រូណែនាំពីមជ្ឈមណ្ឌល និងបានធ្វើឡើងនៅតាមសាកលវិទ្យាល័យនានាដែលមាននិស្សិតទទួលបានអាហារូបករណ៍ ដូចជាសាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច និងសាកលវិទ្យាល័យអាមេរិកាំងអន្តរជាតិ។
ក្រោមជំនួយរបស់រាជរដ្ឋាភិបាលនៃប្រទេសជប៉ុន មជ្ឈមណ្ឌលបានអនុវត្តនូវគម្រោងអាហារូបករណ៍សរសេរសារណាសម្រាប់និស្សិតបញ្ចប់ការសិក្សាថ្នាក់បរិញ្ញាបត្រ ដែលជាគម្រោងតូចមួយក្នុងចំណោមគម្រោងតូចៗទាំងបួននៃគម្រោងអាណត្តិកេរដំណែលរបស់មជ្ឈមណ្ឌល ដែលទទួលបានជំនួយថវិកាពីមូលនិធិបដិភាគជប៉ុន (Japan V)។ គម្រោងផ្តល់អាហារូបករណ៍សរសេរសារណានេះ មានរយៈពេលអនុវត្តចំនួន២ ឆ្នាំ គឺឆ្នាំ២០២២ និងឆ្នាំ២០២៣ ដោយមានវដ្តគម្រោងរយៈពេលមួយឆ្នាំ៕
អត្ថបទ ៖ ម.ត.ឯ.ច.
បទបង្ហាញពី ម.ត.ឯ.ច.
សកម្មភាពការងាររបស់ ម.ត.ឯ.ច.(LDC)
អំពី ម.ត.ឯ.ច.