ម.ត.ឯ.ច. ៖ សន្និសីទលើកទី១ «អនាគតកម្ពុជាដោយគ្មានអំពើប្រល័យពូជសាសន៍» ត្រូវបានប្រារព្ធពិធីបិទកាលពីថ្ងៃពុធ ទី២២ ខែឧសភា ឆ្នាំ២០២៤ នេះក្រោមអធីបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា។ នៅក្នុងពិធីដ៏មានអត្ថន័យនេះ សម្ដេចតេជោបានសម្ដែងនូវក្ដីរីករាយដែលបានចូលរួមក្នុងសន្និសីទនេះ ជាពិសេសក្នុងសាល «យុត្តិតេជោ» ដែលជាអតីតសាលាក្ដីខ្មែរក្រហម។
ថ្លែងក្នុងពិធីបិទនេះ សម្ដេចបានរំឭកអំពីសាវតារនៃអាគារ និងទីតាំងនេះ ដែលត្រូវបានយកមកធ្វើជាសាលាក្ដីខ្មែរក្រហម ដើម្បីកាត់ទោសអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យ។ សម្តេចតេជោ ហ៊ុន សែន បានមានប្រសាសន៍បន្តទៀតថា មេរៀនសម្រាប់កិច្ចការពារ និងប្រយុទ្ធប្រឆាំងអំពើប្រល័យពូជសាសន៍មិនមែនសម្រាប់តែប្រជាជនកម្ពុជានោះទេ គឺសម្រាប់សហគមន៍អន្តរជាតិផងដែរ។ ក្រៅពីនេះសម្ដេចតេជោ ក៏អំពាវនាវឲ្យនាំគ្នាថែរក្សាសុខសន្តិភាពដើម្បីបន្តការអភិវឌ្ឍន៍ប្រទេសរបស់យើង និងទប់ស្កាត់ការវិលមកវិញនៃរបបប្រល័យពូជសាសន៍។
សន្និសីទលើកទី១ «អនាគតកម្ពុជាដោយគ្មានអំពើប្រល័យពូជសាសន៍» ត្រូវបានប្រារព្ធធ្វើឡើងរយៈពេល៣ថ្ងៃ ចាប់ពីថ្ងៃទី២០ ដល់២២ ខែឧសភា ឆ្នាំ២០២៤ នៅអតីតសាលសវនាការសាលាក្តីខ្មែរក្រហម ដែលបច្ចុប្បន្នត្រូវបានប្រសិទ្ធនាមថា «សាលយុត្តិតេជោ»។ សន្និសីទនេះបានរៀបចំសហការដោយទីស្ដីការគណៈរដ្ឋមន្ត្រីដោយមានមជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអ.វ.ត.ក. (LDC) រួមជាមួយនឹងអ.វ.ត.ក. (ECCC) រួមជាមួយមជ្ឈមណ្ឌលឯកសារកម្ពុជា (DC-Cam)។
