សកម្មភាពការងារ

លោកធួក ធាងលី អនុប្រធានមជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអ.វ.ត.ក. (LDC) បានចូលរួមធ្វើជាអ្នកសម្របសម្រួលក្នុងវគ្គពិភាក្សាលើប្រធានបទ

លោកធួក ធាងលី អនុប្រធានមជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអ.វ.ត.ក. (LDC) បានចូលរួមធ្វើជាអ្នកសម្របសម្រួលក្នុងវគ្គពិភាក្សាលើប្រធានបទ «យុវជន និងការអប់រំ» នារសៀលថ្ងៃចន្ទ ទី២០ ខែឧសភា ឆ្នាំ២០២៤ ដែលជាថ្ងៃទី១នៃសន្និសីទលើកទី១ «អនាគតកម្ពុជាដោយគ្មានអំពើប្រល័យពូជសាសន៍»។ នៅក្នុងវគ្គពិភាក្សានេះ មានវាគ្មិនជាច្រើនដូចជាឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាអនុប្រធានក្រុមការងាររាជរដ្ឋាភិបាល
ទទួលបន្ទុកការអនុវត្តមុខងារសេសសល់របស់អ.វ.ត.ក., បណ្ឌិត ហឹង ធីហុង ង៉ា សាស្ត្រាចារ្យប្រវត្តិវិទ្យា នៃមហាវិទ្យាល័យប្រវត្តិសាស្ត្រ សាលកវិទ្យាល័យជាតិនៃសាធារណរដ្ឋសង្គមនិយមវៀតណាម, បណ្ឌិត ឆាលើមឆៃ ផាន់ថាឡីត នាយកវិទ្យាស្ថានសិក្សាសង្គម ក្រសួងអប់រំព្រះរាជាណាចក្រថៃ, លោកជំទាវ ម៉ារៀរ អាមីលីតា អាគីណូ អតីតឯកអគ្គរដ្ឋទូតសាធារណរដ្ឋហ្វីលីពីន ប្រចាំព្រះរាជាណាចក្រកម្ពុជា ព្រមទាំងវាគ្មិនមួយចំនួនទៀត។

មជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអ.វ.ត.ក. (LDC) ក៏បានរួមចំណែកយ៉ាងសកម្មក្នុងផ្ដល់ការអប់រំស្ដីអំពីរបបប្រល័យពូជសាសន៍ ព្រមទាំងកេរដំណែលនៃអ.វ.ត.ក. តាមរយៈសកម្មភាពចុះផ្សព្វផ្សាយនៅតាមបណ្ដាវិទ្យាល័យ និងសាកលវិទ្យាល័យនានាទូទាំងប្រទេស។ ជាក់ស្ដែងកាលពីអំឡុងឆ្នាំ២០២៣ កន្លងមកមជ្ឈមណ្ឌលបានចុះធ្វើការផ្សព្វផ្សាយបានចំនួន១១រាជធានីខេត្ត នៅតាមគ្រឹះស្ថានសិក្សាចំនួន៥១ទីតាំង និងមានអ្នកចូលរួមប្រមាណ៥.៣២៥រូប។

សន្និសីទលើកទី១ ស្ដីអំពី «អនាគតកម្ពុជាដោយគ្មានអំពើប្រល័យពូជសាសន៍» ត្រូវបានរៀបចំឡើងរយៈពេលបីថ្ងៃ (២០-២២ ឧសភា ២០២៤) នៅអតីតសាលសវនាការសាលាក្តីខ្មែរក្រហម ដែលបច្ចុប្បន្នត្រូវបានប្រសិទ្ធនាមថា «សាលយុត្តិតេជោ» ដែលសហការរៀបចំឡើងដោយទីស្ដីការគណៈរដ្ឋមន្ត្រីដោយមានមជ្ឈមណ្ឌលតម្កល់ឯកសារច្បាប់ពាក់ព័ន្ធនឹងអ.វ.ត.ក. (LDC) រួមជាមួយនឹងអ.វ.ត.ក. (ECCC) និងមជ្ឈមណ្ឌលឯកសារកម្ពុជា (DC-Cam)៕